Cerita si Gontit Badoh...

Ada saturang manusia bijak, nama dia si Gontit Badoh.. dia mengalami kesusahan dalam kewangan dia.. tapi dia bijak, memang bijak..

Satu hari si Gontit pi jumpa dengan Tuhan.. (tejumpa juga lah kali dia tu..)

Si Gontit tau perkara ini - bagi Tuhan, duit $100 ribu di dunia, macam 10 sen saja, dan duit $1 juta pula macam $1 ringgit (cam gitu lah bah tu kali) - tu lah sebab sia bilang si Gontit Badoh bijak... memang bijak...

Jadi si Gontit pi minta tulung sama Tuhan.. dia bilang "Tuhan.. sia mo minta tulung.."

Jadi Tuhan pun jawablah.. "Hmmm.. basar juga gontit ko tu Gontit, macam gontit itu badoh.."

Si Gontit pun cakap lagi, sebab dia bijak kan.. "Tuhan.. jan ber'digression' bah.. ko tau.. ni gontit ni simbolik ni..." (sori, si pencerita yang ada 'digress' sikit.. hehe)

Tuhan jawab lagi... "Hmm.. apa gia tu Gontit?" sambil meningu gontit si Gontit yang memang .. atuukoi.. besar..

"Minta tulung sikit, Tuhan... bulih sia minta pinjam $1?".. bilang si Gontit

Tuhan gusuk-gusuk hidung dia... "Hmm... bah bulihlah..." bilang Tuhan...

Tapi si Gontit yang bijak tidak tau seperkara - bagi Tuhan satu saat di dunia adalah10 tahun, dan 1 minit pula adalah 100 tahun... (kurang lebih cam tu lah kali tu)

Tuhan sambung lagi... "hmm.. Gontit.. teda masalah bah tu, bulih bah kalau ko" Tuhan bilang

"Tapi tunggu kijap aaa.. sia mo pi ambil wallet dulu... bagi sia satu minit bulih? mana suadah sia simpan wallet sia tu..." Tuhan bilang

Jadi si Gontit dengan hati yang sangat gembira sekali pun menunggu lah Tuhan pi ambil wallet dia sebab Tuhan sudah setuju sama apa yang dia minta..

Bijak, memang si Gontit Badoh bijak...